8-тӥ толсуре 2006-тӥ арын Удмурт Дунне газетлэн быдэс бамез трос мон сярысь статья потӥз, пӧрасез — Елена Никитина. Удмурт Дуннелэн сайтэз соку ӧй вал на бере, сыӵе дуно статьяез аслам блогам интыяно кариськи. Ганяк кариське но лыдӟелэ.

ОдӤг пол интернетын бугыръяськыкум, удмурт кылын дасям сайт вылэ мырӟиськи. Соос сокем трос ӧвӧл бере (уг янгыша, дыр, туж ӧжыт шуи ке), нырысь- валысь синъёсы чылкак палёмизы. Ма, кин-о сайтсэ таӵе аспӧртэмлыко малпам: сьӧд буёло экран вылын тӧдьы букваос пото – та «укноез» кылдытӥсь озьы аслэсьтыз малпанъёссэ гожтэм, татчы ик интыям удмурт кылын кылбуръёссэ но. Сайтэз пыр-поч сӥсъяме бере тодӥ: сое дасям егит пи Эрик KAZAKofSKY.
Таӵе нимтулэз адӟыса, нош ик абдрай. Ма, кинӟо со сыӵе? Оло нош кунгож сьӧрысь адями? Озьы ке луысал, быгатысал шат со удмурт кылын кылбуръёс гожъяны?Оло нош кылэз ас мылкыд каремезъя дышетӥз…
Йырам чилектэм юанъёсын мон асме кема ӧй курадӟыты. Кутӥ но солы электрон гожтэт пӧрай. Трос-а ӧжыт-а дыр ортӟиз со бере, мон та пияшен пумиськи ик…

Эрик KAZAKofSKY – со Алнаш ёросысь Казакгуртын вордскем пияшлэн Роман Романовлэн псевдонимез. Та дыре дышетске Ижысь механикая кун университетлэн информатикая но вычислительной техникая факультетаз 4-тӥ курсын. Зэмзэ вераса, Ромаез интернетлэсь ( компьютерлэсь) нимаз син азе пуктыны ик уг луы. Соос чылкак люконтэм эшъёс кадь. Дышетсконэзлы кыӵе ке ивор кулэ-а яке эшъёсыныз ваче кенешемзы потэ-а, оло нош дуннелы ачиз сярысь верамез потэ-а – та ласянь номырин воштонтэм интернет. Котьма ке но, нош малы одно Эрик? Мар шуэмез возьматэ KAZAKofSKY?
— Мыным туж кельше «эрик» кыллэн пуштросэз, — веранзэ мытэ Рома. Со сяна, сюлэмыя Эрик ним но. Малпасько, со гердӟаськемын удмурт кылбурчилэсь Эрик Батуевлэсь творчествозэ гажаменым. Куд- ог кылбуръёссэ синкылиосы вияса лыдӟисько. Нош KAZAKofSKY пӧрмытэмын пӧртэм кылъёслэсь: KAZAK люкетэз возьматэ вордскем гуртэлэсь нимзэ, SKY люкетэз, англи кылысь берыктыса , «инбам, инбамлэн буёлэз» шуэмез возьматэ. МОн асме куддыр ӵошатӥсько ӧрӟиен, нош со эриктэк, интэк улыны уг быгаты. Куд- ог эшъёсы Эрик шуса вазисько. Тусам- буям тупа ни-а мар-а та ним, — мыньпотӥз Рома.
— Нош мар пумысен удмурт кылын сайт усьтын мылкыдыд пуромиз?
— Шонерак вераса – асме возьматэме потӥз. Дунне вылын улӥсь тросэз адямиос ас пушказы выйыса уло, азьланань мыныны, улонысь маке тунсыкозэ шедьтыны мылкыдзы чик ӧвӧл. Нош мон сыӵе ӧвӧл. Мыным ваньмыз тунсыко. Отын но, татын но асме эскереме потэ. Интернет та ласянь бадӟым луонлыкъёс сётэ. Сои ник мон малпай сое уже кутыны. Куд- ог бадӟым интернет фирмаос ӵекто «хостинг» амалэз. Со интернетын чик дунтэк усьтыны быгатод аслэсьтыд «укнодэ». Мон но ӵапак та амалэз уже кутӥ. Туэ август толэзе сайтэ усьтӥськиз… Зэм, сое выльдыны дыр чик уг шедьтӥськы.
— Сыӵе малпан кылдэ, Рома: тон вордскем берад ик , оло, компьютерен одӥг кыл шедьтӥд ни…
— Зэмзэ вераса, мынам аслам компьютере кылдӥз ай ог ӝыны ар талэсь азьло гинэ. Нырысетӥ но кыкетӥ курсын квартираын улӥ. Но валай, отын улон мыным уг тупа. Улонлэсь бере кылисько кадь потӥз. Сои ник выжи Ижысь механикая кун университетлэн огъяуллонияз. Нош татын сомында эшъёс, соосын кенешыса, сомында выльзэ усьтӥськод. Туала студентъёслэн котькудзылэн сямен ик вань компьютеръёссы. Тани милям огъяулонниямы но котькуд комнатаын сямен ик 1-2 компьютер сылэ. Ужа интернет. Тросэз студентъёс чатъёсын (пӧртэм сайтъёс пыр адямиосын «улэп» дырын кусып тупатон) пуко, ог- огензы тодматско. Кудогъёсыз пӧртэм компьютер сьӧрын пукисьёс – ог-огенызы ваче ыбылӥськыса шудо. Кемалась ӧвӧл тани механикая университетын дышетскисьёс куспыдышетскисьёс куспын компьютер шудонъя турнир ялэмын вал. Вормисьёс но луозы, пе. Но мон отчы уг пыриськиськы. Куд-ог дыръя уго компьютер шудонъёс улонлэсь чеберзэ адӟыны люкето, дырез гинэ быдто.
— Азьмынӥсь кунъёс гырлы жуго ини: компьютерен мултэс эшъяськеменызы уг быгато никотырысьтызы адямиосын кусып тупатыны. Тӥ пӧлын но уг поръя на таӵе «чер»?
— Зэм но, мон малпасько, вань сыӵе кышкытлык. Уен-нуналэн компьютер азьын пукид ке, амалтэк шузимод. Сыӵе дыръя тазалык сярысь веранэз ик ӧвӧл ни. Но мон компьютереным ваче син кема пукыны уг быгатӥськы. Акыльтӥсько. Султӥсько, огъяулоннитӥ поръясько, бускель комнатысь нылъёс доры пырыса, мак сярысь вераськиськом-кенешиськом. Спорт сярысь но ум вунэтӥське. Тани толалтэ вуиз ини: эшъёсын огазе люкаськыса, конькиен нискыланы поталомы…
— Тынад сайтад, Рома, туж трос кылбуръёсыд. Соосты гожъян мыл�
�ыдыд ӵем-а бугырскылэ?
— Тани ӵапак туннэ лекциын ( мӧзмыт ук куддыр отын) кылбур гожъяса пуки. Анаелэн вордскем нуналыз матэктэ, соин ик солы солы сӥзи сое. Таӵе мылкыды ӵем уг пуромылы. Доре бертӥськод – отын мукет ужъёс сюро. Нош тазьы параосын мӧзмыку, малпанъёс йырам лыкто но лыкто, соосты гожъяса кельтӥсько. Ӵемгес соос пӧрмо мылкыды секыт дыръя. Сои ник соос «чырсам» шӧмоесь. Сайтме но сьӧд буёлэн «буяй», со адӟытэ мӧзмемме, малпаськонэ усемме. Котьма ке но букваос тӧдьыесь ук! Соос секыт сьӧд буёлэз сайяло кадь, капчигес каро. Зэмзэ вераса, мынам тазьы сайтме аспӧртэмлыко кареме потӥз. Ато ӵемысь соос ваньзылэн огкадьгес луо. Ӧй малпа вал, сое усьтыса, сомында тодмо но йӧно эшъёс шедьто шуса. Али татысь но, кунгож сьӧрысь но егитъёсын кусып возисько. Тани кемалась ик ӧвӧл кылбуръёсме келяй Венгриысь тодмоелы Лариса Широбоковалы, соосты, пе, пыртозы кылбуръёсын бичетэ.
— Мон шӧдӥ: тон ас азяд пуктэм ужпумъёстэ быдэстытэк, малпанъёстэ улонэ пыӵатытэк уд кельтӥськы. Ма бордын ужалод азьланяз?
— Туж вожъяськисько Англиысь Уэльсын улӥсьёслэн валлий кылзэс утьыны быгатэмзылы. Эх, малпасько, удмурт кылэз но озьы ик утьыны, азинтыны пӧрмытысалмы ке…Та ласянь, оло, ӵапак юрттысалзы туала технологиос. Кылсярысь, удмурт кылын веб- сайтъёстывӧлмытыса, асьмеос кылмес утьыны быгатысалмы, озьы удмуртъёс сярысь тодысал быдэс дунне.
Удмурт калыклэн возьдаськонэз вань бере, сайтъёс пыр кусып возён капчиенгес сётскысал, вылды.
Отын уго кинэн ке ваче син вераськоно ӧвӧл, палэнысь муртлы котькыӵе ӵектонэн- малпанэн вазиськыны быгатод. Удмурт кылын потӥсь сайтъёсты дасян сярысь мед сюлмаськозы вылэм асьме кивалтӥсьёс но. Озьы асьмеос туала улонлэсь бере кыльытэк азинскысалмы.
— Гуртын будэм пиналъёс тодон — валанзыя городынъёсызлэсь бере кылё — ӧжыт ӧвӧл таӵе малпанэн улӥсьёс. Ачидъя тон вераны быгатод-а, та кылъёс зэм шуыса?
— Гуртысь городэ дышетскыны вуыса, нырысь – валысь аслым ачим кыр адями кадь потӥсько вал. Бӧрсьысьгес валай: котырысьтым адямиосын мон ачим кусып ӧй тупаты ке, нокин монэн уз эшъяськы. Та дырлы мынам туж трос ни тодмоосы. Кинэн интернет пыр кусып тупатӥ, мукетъёсыныз дышетскон сямен тодматски. Куд – ог дыръя тазьы но луыса кошке: аслэсьтым малпанъёсме верасько городын будэм эшъёсылы, нош соос монэ кылзо но «тынад верамед укыр малпаськытӥсь но мур пуштросо» шуо. Мон малпамъя, ваньмыз адями бордысь потэ. Солэн выльзэ тодэмез потӥз ке, кыӵе ке удысэн тунсыкъяськиз ке – котьку одӥг кыл шедьтоз котыр калыкен. Адями егит дырысеныз ик ас бордаз ужаны мед дышетскоз.
Зэмзэ верано ке, гуртэ бертылыны мон тужи к уг яратӥськы. Отын час стрелкаос интыысьтызы уг вырӟыло кадь потэ. Отын дыр туж кален ортче . Соку амалтэк малпаськод: эх, городын кӧня выльзэ, тунсыкозэ тодысалыд ни та дыр ӵоже…